Sosial müdafiəyə xüsusi ehtiyacı olan istedadlı tələbələrin təhsil xərclərinin maliyyələşdirilməsinə dair Azərbaycan Prezidenti İlham Əliyevin göstərişinə əsasən Gənclər Fondunun elan etdiyi müsabiqənin qalibləri ilə oktyabrın 4-də Bakı Konqres Mərkəzində görüş keçirilib.
Görüşdə müsabiqənin qalibi olan gənclər, onların valideynləri, dövlət rəsmiləri, Milli Məclisin deputatları, qeyri-hökumət təşkilatlarının nümayəndələri iştirak ediblər.
Gənclər Fondunun icraçı direktoru Fərid Cəfərov, Təhsil naziri Ceyhun Bayramov, Milli Məclisin gənclər və idman komitəsinin sədri Ülvi Quliyev gəncləri təbrik edib, yeni tədris ilində onlara uğurlar arzulayıblar.
Çıxışlarda vurğulanıb ki, keyfiyyətli təhsilin gənclər üçün əlçatanlığının artırılması, savadlı, dövlətə, milli-mənəvi dəyərlərə bağlı gəncliyin yetişdirilməsi, gənclərə dövlət qayğısı, eləcə də sosial müdafiəyə ehtiyacı olan gənclərin dəstəklənməsi Prezident İlham Əliyevin həyata keçirdiyi dövlət gənclər siyasətinin əsas istiqamətlərindəndir. Dövlətimizin başçısının təşəbbüskarı olduğu insan kapitalının inkişafı konsepsiyasına uyğun olaraq, son illər gənclər üçün hərtərəfli imkan yaradılır. Xüsusilə sosial həssas kateqoriyalara aid, I və II qrup əlilliyi olan gənclərin təhsil haqlarının dövlət vəsaiti hesabına ödənilməsi, gənclərin xarici ölkələrin nüfuzlu ali təhsil müəssisələrində təhsilinin dəstəklənməsi və digər addımlar bu qəbildəndir.
Qeyd olunub ki, son bir il ərzində təhsilin inkişafı, tələbələrin sosial vəziyyətinin yaxşılaşdırılması və gənclərin xaricdə təhsili ilə bağlı dövlətimizin başçısı tərəfindən bir neçə fərman və sərəncamlar imzalanıb, dövlət proqramları təsdiqlənib. Tələbələrin təqaüdü 20 faiz artırılıb və bu 1100 gənci əhatə edib. Hazırda 500 azərbaycanlı gənc Çin, Rumıniya, Macarıstan, Latviya, Rusiya və digər ölkələrdə təhsil almaq hüququ qazanıb. Xaricdə fəaliyyət göstərən nüfuzlu ali təhsil müəssisələrinin ölkəmizdə filiallarının açılması və qarşılıqlı əməkdaşlığın qurulması və ikili attestat sisteminin tətbiqi istiqamətində mühüm işlər görülür.
Müsabiqənin qalibləri çıxışlarında gənclərə dövlət qayğısının artırılması ilə bağlı Prezident İlham Əliyevin növbəti təşəbbüsü olan hazırkı maliyyələşmə mexanizminin əhəmiyyətindən, xüsusilə sosial həssas kateqoriyalardan olan gənclər üçün təhsilin əlçatanlığının artırılmasına diqqət və qayğısından danışıblar. Gənclər təhsilin inkişafına, onlara göstərilən hərtərəfli dəstəyə görə dövlətimizin başçısına minnətdarlıqlarını bildirdilər.
Çıxışlardan sonra tədbirdə qalib gənclərin uğur hekayələrindən bəhs edən videoçarxlar nümayiş olunub. Daha sonra müsabiqənin qalibləri ilə təhsil xərclərinin ödənilməsinə dair müqavilələr imzalanıb.
Xatırladaq ki, sosial müdafiəyə xüsusi ehtiyacı olan istedadlı tələbələrin təhsil xərclərinin maliyyələşdirilməsi üzrə 2018-ci ildə keçirilmiş müsabiqə nəticəsində 237, builki müsabiqə nəticəsində isə 425 gəncin təhsil haqqı xərclərinin dövlət tərəfindən ödənilməsi qərara alınıb.