Maarifçilik redaksiyası

         Maarifçilik redaksiyası 2007-ci ilin aprelində həyata keçirilmiş struktur dəyişiklikləri nəticəsində yaradılan yeni qurumlardan biridir. Bu redaksiya cəmiyyətimizdə bilik, savad və mədəniyyəti sistemli şəkildə təbliğ edən, estetik, etik, ictimai və bədii ideyaları formalaşdıran verilişlər hazırlayır. Redaksiya tamaşaçılara 16 adda veriliş təqdim edir.
         «Sağlamlıq» verilişi səhiyyə proqramıdır. Ayda 4 dəfə (hərəsi 30 dəqiqə) efirə çıxır. Burada ölkə səhiyyəsindəki ən müxtəlif elmi nailiyyətlərdən və problemlərdən bəhs olunur.
         «Təhsil və tərəqqi» verilişi maarifçilik proqramıdır. Ayda 4 dəfə (hərəsi 30 dəqiqə) efirdədir. Verilişdə təhsilin aktual problemləri şərh olunur, onların elmi-nəzəri xüsusiyyətləri peşəkar mütəxəssislər tərəfindən təhlil edilir.
         «Sarı sim» bədii-publisistik proqramdır. Ayda 4 dəfə (hərəsi 30 dəqiqə) efirə çıxır. Burada Azərbaycanın görkəmli ədəbiyyat, incəsənət, elm xadimləri, müxtəlif peşə sahibləri barədə portret-oçerklər hazırlanır. Veriliş həm dünyasını dəyişmiş, həm də çağdaş dövrdə fəaliyyət göstərən insanlara həsr olunur.
         «Bağçılıq» kütləvi proqramdır. Ayda 4 dəfə göstərilir. 30 dəqiqə ərzində mövsümi bağçılığın vacib problemləri barədə maraqlı məlumatlar verilir, ayrı-ayrı bağ və bostan bitkilərinin becərilməsi öyrədilir, istixanaların işlədilmə texnologiyası aydınlaşdırılır.
         «Yeni əsr, yeni nəsil» yarım saatlıq bədii-publisistik proqramdır. Ayda 2 dəfə efirə çıxır. Burada «Regionların Sosial-İqtisadi İnkişaf Proqramı» və Heydər Əliyev Fondunun xətti ilə ölkəmizdə tikilən və təmir olunan məktəblər barədə reportaj-oçerklər hazırlanır. Verilişdə həmçinin təhsilin vacib problemlərinin elmi-nəzəri prinsipləri, qabaqcıl texnologiyanın tətbiqi istiqamətində görülən işlər barədə də süjetlər verilir.
         «Zəka nuru» nəzəri-publisistik proqramdır. Ayda 2 dəfə (hərəsi 30 dəqiqə) göstərilir. Ölkəmizdə çap olunmuş bədii, elmi-texniki, ensiklopedik xarakterli nəşrlərin təbliği və şərhi diqqət mərkəzində saxlanılır. Verilişdə həmçinin milli zəka sahiblərimiz haqqında kiçik formatlı portret-oçerklər də yaradılır.
         «Təklikdə hamı ilə» 45 dəqiqəlik kütləvi-publisistik maarifçi proqramdır. Ayda 2 dəfə efirə çıxır. XIX əsrdən tutmuş XX əsrin I yarısına kimi Azərbaycanda, eləcə də azərbaycanlıların böyük əksəriyyət təşkil etdikləri Tiflis və İrəvan şəhərlərində fəaliyyət göstərmiş maarifpərvər ziyalılar, ictimai xadimlər barədə nəzəri-təhlili, tarixi-xronoloji bədii oçerklər verilir.
         «Ekologiya və həyat» yarım saatlıq kütləvi publisist proqramıdır. Ayda 2 dəfə nümayiş etdirilir. Verilişdə ölkəmizin ən vacib ekologiya məsələləri həm publisist, həm də elmi-nəzəri baxımdan təcəssüm tapır. Həmçinin dünyanın mühüm ekoloji problemləri və hadisələri haqqında ayrıca rubrikada məlumat verilir.
         «Orfey» bədii-publisistik proqramdır. Ayda 2 dəfə (hərəsi 30 dəqiqə) efirə çıxır. Verilişdə antik dövrdən bu günümüzə qədər mövcud olmuş musiqi janrlarının estetik səciyyələrindən, dünyanın korifey sənətkarlarının, məsələn Antonio Vivaldi, İohan Sebastyan Bax, Lüdviq van Bethoven, Vilhelm Rixard Vaqner, Cakomo Puççini, Coakkino Rossini, Cüzeppe Verdi, Modest Musorqski, Pyotr Çaykovski, Mixail Qlinka və başqalarının yaradıcılığından bəhs edilir.
         «Min illərin işığı» publisist-etnoqrafik proqramdır. Ayda 2 dəfə (30 dəqiqəlik) göstərilir. Verilişdə geniş mənada türkdilli xalqların mənəvi dəyərlərindən, ortaq mədəniyyət xüsusiyyələrindən elmi-nəzəri söhbət açılır.
         «Daş nağılı» bədii-publisistik proqramdır. Ayda 2 dəfə (hərəsi 30 dəqiqə) efirə çıxır. Bakıda müxtəlif illərdə ucaldılmış heykəllər, onların müəllifləri və memarları barədə elmi-informatik məlumat verilir.
         «Vernisaj» 15 dəqiqəlik bədii-publisistik proqramdır. Ayda 2 dəfə nümayiş etdirilir. Verilişdə Azərbaycan Dövlət İncəsənət Muzeyində qorunan dünya xalqlarının sənət inciləri və Azərbaycan təsviri sənətinin nadir nümunələri barədə elmi-nəzəri biliklər çatdırılır. Gələcəkdə proqramda Azərbaycan Dövlət Tarix Muzeyinin, Azərbaycan Dövlət Xalçaçılıq Muzeyinin nadir eksponatları barədə də məlumatlar olacaq.
         «Sabahın təhsili» tok-şoudur. Ayda 1 və ya 2 dəfə (hərəsi 45 dəqiqə) efirə çıxır. Burada səhiyyə sistemindəki ən ciddi problemlər alim, həkim və psixoloqlar tərəfindən təhlil edilir.
         «Ailə həkimi» efirə canlı çıxır. Həftədə 5 dəfə (4 gün – 50 dəqiqə, 5-ci gün – 40 dəqiqə) göstərilir. Verilişin aparıcısı peşəkar həkimdir. Tamaşaçılarla telefon əlaqəsi saxlanılır və müraciət edənlərin problemləri barədə onları istiqamətləndirən məlumat və ya tövsiyələr verilir.
         Maarifçilik redaksiyasının baş redaktoru İlham Rəhimli, müavini Bəxtiyar Bəxtiyarov, baş rejissoru Nazim Zeynalovdur.