Kino və Dublyaj Redaksiyası

         Azərbaycan Televiziya və Radio Verilişləri Qapalı Səhmdar Cəmiyyətinin kino redaksiyası 1956-cı ildən fəaliyyətə başlayıb. 1966-cı ildə isə Dövlət Televiziyasında dublyaj redaksiyası da yaradılıb. Kino və dublyaj redaksiyası Azərbaycan televiziyasının kino siyasətini müəyyənləşdirir və efirdə milli mənəvi dəyərlərə xidmət edən kino məhsullarının nümayiş etdirilməsinə çalışır.
         Kino və dublyaj redaksiyasında «Dünya kino ulduzları», «Kinoarena», «Kino-xəbər», «Kino və musiqi», «Kinoştrix», «Kinoda yaşayan ömür» verilişləri hazırlanır.
Bundan başqa, həftədə bir dəfə kinoredaksiya Dövlət Film Fondunun Kolleksiyasından olan filmləri tamaşaçılara təqdim edir.
         Azərbaycan dövlət müstəqilliyini əldə etdikdən sonra Azərbaycan dilinin qorunması və inkişaf etdirilməsi məsələsi aktuallaşdı və filmlərin dublyaj edilməsinə böyük ehtiyac yarandı. 1994-cü ildə fəaliyyətini bərpa edən Dublyaj redaksiyası Ümummilli lider Heydər Əliyevin 2001-ci il 18 iyun tarixli «Dövlət dilinin tətbiqinin təkmilləşdirilməsi tədbirləri haqqında» fərmanından sonra daha güclü rejimdə işləməyə başladı. Hazırda bu redaksiya ayda 30-40 saata qədər bədii, sənədli, çizgi filmlərini dublyaj edir. Hər filmin dublyajına böyük aktyor dəstəsi cəlb edilir.
         Bu redaksiyada Sevda Ağayeva, Afaq Əhmədova, Lalə Hüseynova, Salar Aslanov, Ramiz Məmmədov kimi redaktorlar, Nazim Sadıqov, Elbrus Zeynalov, Tahirə Hüseynova, Sənan Sultanov kimi rejissorlar çalışırlar.
         Kino və dublyaj redaksiyasının baş redaktoru Səyavuş Məmmədov, müavini Salar Aslanov, baş rejissoru isə Zahid İsmayılovdur.