İqtisadiyyat

Bakıda “İnnovasiya ekosisteminin qurulması” adlı seminar başlayıb

19-10-2017 | 15:59        

  

Bu gün Bakıda “İnnovasiya ekosisteminin qurulması” adlı seminar başlayıb. Tədbirdə Heydər Əliyev Fondunun vitse-prezidenti  Leyla Əliyeva, hökumət nümayəndələri, millət vəkilləri, dövlət və özəl sektorun təmsilçiləri iştirak ediblər.

Seminarın keçirilməsində məqsəd müvafiq dövlət və özəl  qurumların  birgə innovasiya ekosisteminin təşəkkülü  ilə bağlı  fəaliyyət planının hazırlanmasına dəstək verməkdir. Tədbirdə çıxış edən Təhsil naziri Mikayıl Cabbarov insan kapitalının inkişaf etdirilməsi sahəsində dünyanın qabaqcıl təhsil ocaqlarından olan Berkli Kaliforniya, Stenford universitetləri, “Global Innovation Catalyst” şirkəti ilə əməkdaşlığın ölkəmizin ali təhsil sistemi üçün yeni imkanlar yaradacağını bildirdi. Prezident İlham Əliyevin təsdiq etdiyi iqtisadiyyatın inkişafı üzrə strateji yol xəritələri və “Azərbaycan Respublikasında təhsilin inkişafı üzrə Dövlət Strategiyası”nın əsas məqsədlərindən biri kimi insan kapitalının vacibliyini vurğulayan Təhsil naziri bu tədbirin gələcəyə baxış strategiyaları ilə innovasiyaların inkişafına xidmət edəcəyini diqqətə çatdırdı. Nazirin sözlərinə görə, bu 3 tərəfli sinerjidə ali təhsil müəssisələri platforma rolunu oynaya bilər. İnnovativ ekosistemin formalaşması və inkişafında sahibkarlıq universitet modelinin günümüzdə daha da aktuallaşdığını qeyd edən Mikayıl Cabbarov Bakı Mühəndislik Universitetinin bu formada fəaliyyət göstərməsi üçün ilk addımlar atdığını bildirdi. Nəqliyyat, Rabitə və Yüksək texnologiyalar naziri Ramin Quluzadə Prezident İlham Əliyevin İKT-nin inkişafını diqqət mərkəzində saxladığını qeyd etdi. Nazirin sözlərinə görə, iqtisadiyyatın hərtərəfli inkişafının təmini, o cümlədən yüksək texnologiyaların dinamik inkişafı məqsədilə dövlət tərəfindən bir sıra uğurlara nail olunub. Sumqayıt Texnologiyalar Parkı, Yüksək Texnologiyalar Parkı, İnformasiya Texnologiyalarının İnkişafı Dövlət Fondu, Mingəçevir Texnologiyalar Parkının yaradılması buna əyani nümunədir. Ramin Quluzadə İnformasiya Texnologiyalarının İnkişafı Dövlət Fondunun  informasiya-kommunikasiya texnologiyaları sahəsində innovativ ideyaların dəstəklənməsi məqsədilə 3 istiqamətdə fəaliyyət göstərdiyini dedi. Bunlar startap layihələrinə qrantların ayrılması, biznesə çevrilən layihələrə güzəştli kreditlərin verilməsi və bir sıra layihələrdə investor kimi çıxış etməkdir. Fondun bugünədək keçirdiyi 5 qrant müsabiqəyə 750-dən çox layihə təqdim olunub. Bu layihələrdən 112-si qalib elan edilib. Yüksək Texnologiyalar Parkında 30-dan çox layihə icra olunur. Bu istiqamətdə nazirlik tərəfindən mövcud ekosistemin inkişafına çox böyük müsbət təsir edəcək yeni innovasiya mərkəzi yaradılır. Hədəf isə İKT sahəsində “Made in Azerbaijan” brendi altında dünya bazarına məhsul və xidmətlər çıxarmaqdır. Ölkənin İKT sektorunda fəaliyyət göstərən startap layihələrinə yerli investorların cəlb edilməsi də prioritetlər arasındadır. Bu məqsədlə IT İnvestorlar Klubunun yaradılması istiqamətində işlər aparılır. Ramin Quluzadə universitetlərdə İKT sektoruna aid digər layihələrə də dəstək verildiyini bildirdi və buna misal olaraq “ADA” Universiteti ilə əməkdaşlığı qeyd etdi. İqtisadiyyat nazirinin müavini Sevinc Həsənova isə çıxışında diqqəti Prezident İlham Əliyevin rəhbərliyi ilə həyata keçirilən  davamlı islahatlara yönəltdi. Bildirdi ki, bunun nəticəsində yaranan iqtisadi potensial dünya iqtisadiyyatında gedən neqativ proseslərdən yaranan şokların Azərbaycan iqtisadiyyatına təsirini minimuma endirib, iqtisadiyyatın yeni şəraitə uyğunlaşdırılmasına imkan yaradıb. İqtisadi sahədə strateji məqsədlərə nail olunmasında innovativ və iqtisadi ekosistem formalaşdırılmasının böyük rolu var. Sevinc Həsənova dedi ki, innovativ ekosistemin formalaşması, çoxşaxəli prosesdir və sahibkarlara, elmi-tədqiqat mərkəzlərinə və digər təşkilatlara səmərəli əməkdaşlıq etməyə imkan yaradır. Çıxışlardan sonra “Global Innovation Catalyst” şirkətinin qurucusu və sədri Kəmran Elahianın “Qazıntı iqtisadiyyatından innovativ iqtisadiyyata” mövzusunda təqdimatı oldu. Sonra Berkli Kaliforniya Universitetinin professoru Qreqori LaBlank “Startap ekosistemi: Silikon Vadisinin əsasları və hökumətin rolu” mövzusunda seminar keçdi. 3 gün davam edəcək seminarda iştirakçılar sahibkarlıq ekosisteminin transformasiyası əsasında bilik əsaslı və innovativ iqtisadiyyatın qurulmasına dair 3 illik fəaliyyət planı hazırlayacaqlar. Seminar çərçivəsində vençur maliyyəsi, sahibkarlıq təhsili və mədəniyyəti mövzusunda təlim və müzakirələr, vençur investorların panel müzakirəsi təşkil olunacaq. Təhsil, İqtisadiyyat, Rabitə və Yüksək Texnologiyalar Nazirlikləri, Azərbaycan Milli Elmlər Akademiyası və Bakı Mühəndislik Universiteti tərəfindən təşkil olunan tədbir çərçivəsində Heydər Əliyev Fondunun vitse-prezidenti Leyla Əliyeva seminar iştirakçıları ilə görüşdü.