Rəsmi xronika

Prezident İlham Əliyev Bakı Bulvarında yenidənqurma işlərinin gedişi ilə tanış olub

21-01-2011 | 18:24        

  

 

Prezident İlham Əliyev yanvarın 21-də Bakı Bulvarının genişləndirməsi proqramı çərçivəsində həyata keçirilən yenidənqurma işlərinin gedişi ilə tanış olub. Azərbaycan Respublikasının Prezidenti İlham Əliyevin sədrliyi ilə  yanvarın 14-də Nazirlər Kabinetinin 2010-cu ilin  sosial-iqtisadi inkişafının yekunlarına həsr olunmuş iclasında dövlət başçısı 2011-ci ildə qarşıda duran vəzifələr sırasında  Bakı Bulvarının Dövlət Bayrağı Meydanı ilə birləşdirilməsi haqında tapşırıqlar vermişdir. Azərbaycan Prezidentinin tapşırıqlarının həyata keçirilməsi ilə əlaqədar Bakı Buxtasında yerləşən bir sıra müəssisə və obyektlərin, o cümlədən Xəzər Dəniz Gəmiçiliyinin Gəmi Təmiri Zavodunun və digər sənaye obyektlərinin köçürülməsi zərurəti yaranıb. Verilən tapşırıqların operativ həlli istiqamətində görülən işlərlə tanış olmaq üçün yanvarın 21-də Azərbaycan Respublikasının Prezidenti İlham Əliyev Gəmi Təmiri Zavodunun ərazisinə gəlib. Dövlət başçısı Gəmi Təmiri Zavodunun sökülən hissəsində işlərin gedişi  ilə yaxından tanış oldu, müvafiq tapşırıq və tövsiyələrini verib.