"Azərbaycan postsovet ölkələri arasında öz mütərəqqi yolu ilə seçilən, Latviya üçün əbədi dost ölkədir".

Bunu “Report”a açıqlamasında Latviya Seyminin (parlament) deputatı Artuss Kayminş (Artuss Kaimiņš) bildirib.

Onun sözlərinə görə, bu gün postsovet ölkələri arasında Avropa dəyərlərinə daha çox maraq göstərən ölkələrdən biri də Azərbaycandır: “Bu baxımdan, Avropa İttifaqı ölkələri ilə Azərbaycan arasında əməkdaşlıq fəal inkişaf edir".

A.Kayminş deyib ki, Latviya ilə Azərbaycan arasında əlaqələr tarixi köklərə malikdir: "Biz vaxtilə eyni rejimin əsarətində olmuşuq, bizi birləşdirən tarixi acılar, ortaq talelər var. Bu baxımdan, xalqlar arasında dostluğun kökü dərindir”.

Latviyalı deputat vurğulayıb ki, iki dövlət arasında hazırkı münasibətlər çoxşaxəli sahələr üzrə qurulsa da, yetərincə sıx deyil və inkişaf etdirilməlidir: “Hər iki ölkə qarşılıqlı əməkdaşlığın daha da inkişafında maraqlıdır. Bu, müxtəlif vaxtlarda ali səviyyəli görüşlərdə də vurğulanıb. Biz çox istərdik ki, qarşılıqlı səfərlər çox olsun. Bizim parlamentlərdə dostluq qrupları var. Hesab edirəm ki, bu məsələdə dostluq qruplarının üzərinə çox böyük iş düşür. Bundan başqa, Latviyada, ümumiyyətlə, Baltikyanı ölkələrdə Azərbaycanla bağlı təbliğat yetərincə qurulmalıdır. Bizim insanlara Azərbaycanla bağlı məlumatlar daha çox lazımdır”.