Bakıda keçiriləcək bədii gimnastika üzrə dünya kuboku “Tokio 2020”yə lisenziya xarakteri daşıyacaq

13 Dekabr, 16:47 Sosial mediada paylaşın:

2019-cu ildə uğurla təşkil edilmiş bədii gimnastika üzrə dünya və Avropa çempionatları da daxil 4 beynəlxalq yarışdan sonra Azərbaycan Gimnastika Federasiyası (AGF) gələn ildə də bu növ üzrə yarışlara hazırlaşır.

AGF-nin xəbərinə görə, gimnastikanın ən zərif nümayəndələrinin yarışları ənənəyə uyğun olaraq apreldə keçiriləcək.

Aprelin 24-26-da təşkil ediləcək dünya kuboku turnirdə iştirak edəcək ölkələrin ilkin qeydiyyat siyahısı dekabrda bəlli olacaq. Bu turnirin iştirakçıları Olimpiadaya vəsiqə qazanmaq şansı əldə edəcəklər. Bakıda təşkil olunan dünya çempionatında “Tokio 2020”yə lisenziyasız qalan gimnastlar bu yarışlarda güclərini bir daha sınayacaqlar.

Yarışların ilk iki günündə təsnifat mərhələləri baş tutacaq və çoxnövçülükdə ən yüksək xal toplamış 8 fərdi gimnast, həmçinin qrup komandaları final mərhələsinə adlayacaqlar. Yarışın sonuncu günündə isə final mərhələsinin qalibləri müəyyənləşəcək.

Ənənəyə uyğun olaraq, turnirdə ən çox icra xalını yığmış gimnast və qrup komandasına ənənəvi “AGF Trophy” kuboku təqdim olunacaq.