Azərbaycan Televiziyasının əsas hədəfi regionun bir nömrəli televiziyası olmaqdır. Bu yolda inamla addımlayan AzTV xarici əlaqələrini necə qurur?
Bu barədə AzTV-nin Beynəlxalq Əlaqələr Departamentinin rəhbəri Elnar Məmmədlinin açıqlamasını təqdim edirik:
“1996-cı ildən ailəm saydığım AzTV-yə ilk gəldiyim günü və mənə ustad jurnalistlərin, məşhur televiziya əməkdaşlarının bu kəlamını çox gözəl xatırlayıram: “Unutma, bura bir növ məbəddir, yəni müqəddəs ocaqdır. Ona sadəcə çörək qazandığın yer kimi baxma, dəyər ver, qiymətini bil, burada Vətən üçün, dövlət maraqlarımız naminə çalışdığımızı əsla yaddan çıxartma!” Mənim onlardan bir televiziya jurnalisti olaraq yetişməyim üçün əxz etdiyim ilkin dəyərlər məhz bunlar idi.
Bu müddət ərzində peşəkar iş həyatımın xeyli hissəsi ölkədən xaricdə keçdi. Düz 14 il. AzTV-nin hazırkı sədri Rövşən Məmmədovla tanışlığımız o, İctimai-siyasi proqramlar studiyasının direktoru olduğu zaman baş tutdu. Bir müddət sonra rəhbərliyin qərarı ilə həmin studiyaya direktor müavini vəzifəsinə təyin olundum. Rövşən müəllimlə birlikdə işlədik. Onun AzTV-yə sədr təyin edilməsindən sonra belə qərar verildi ki, Beynəlxalq Əlaqələr Departamentinə rəhbərlik edim. Yeni sədrdən mənə və bütün kollektivə ilk tapşırıq bu idi: “Biz AzTV-ni ən azı regionun bir nömrəli televiziyası etməliyik. Bunun üçün əl-ələ verib var gücümüzlə çalışacağıq. Beynəlxalq əlaqələr xüsusi önəm kəsb edir. Bu, televiziyamızın bilavasitə işidir, amma həm də xarici kanallarla quracağımız səmərəli münasibətlər bizə imkan verəcək ki, bu vasitə ilə öz növbəmizdə Azərbaycanı dünyada tanıdaq. Onlarla ortaq layihələr, xüsusilə də telekörpü formatında verilişlər edə bilərik. Mübadilə əsasında proqramlarımızı oralara da yönləndirə bilərik və sairə”.
Beləliklə, işə başladıq.
Son iki ildə pandemiyanın ağır şərtlərinə rəğmən nəticəmiz necə oldu?
Bu müddət ərzində ilk növbədə qardaş Türkiyənin TRT, qardaş Pakistanın “BOL Media” qrupu ilə sıx əlaqələr quruldu. TRT-AzTV işbirliyi indi elə bir səviyyəyə gəlib çatıb ki, artıq ortaq layihələr həyata keçirilir. Ən yaxın gələcəkdə tamaşaçılar bu əməkdaşlığın çox gözəl yeni nəticələrini görəcəklər. Sadəcə detallara getmək peşəkarlıq nəzər nöqtəsindən doğru olmadığı üçün hələlik yeni planlarımızı açıqlamırıq. Ancaq çox yaxın zamanda yeni planlar daha da produktiv və hətta ortaq istehsal mahiyyəti daşıyacaq. Hazırda bütün reytinqlərdə birinci olan “Diriliş. Ərtoğrul” bu əməkdaşlığın nəticəsində ölkəmizdə yayımlanır.
Pakistanın “BOL media” korporasiyası isə dünyaya yayım həyata keçirir. Nəhəng beynəlxalq strukturla AzTV hazırda sıx əməkdaşlıq edir. İlk telekörpü “Əsas məsələ”də həyata keçirilib. Bu müddət ərzində Çinin CCTV kanalı AzTV ilə mübadilə əsasında əməkdaşlıq etməyə başlayıb. Çoxlu filmlər, konsertlər, proqramlar mübadiləsi edilib və proses bu gün də davam etməkdədir.
AzTV rəhbərliyi bütün türk dövlətlərinin televiziyaları ilə əməkdaşlığa böyük önəm və əhəmiyyət verir. Artıq bu əməkdaşlığın xüsusi mərhələyə qədəm qoyduğunu deyə bilərik. “Türk dünyası” layihəsi AZTV, TRT, Qazaxıstan TV, Qırğızıstan TV, Türkmənistan TV və Özbəkistan TV-nin ortaq verilişidir. Bu gün tamaşaçılar bütün türk dövlətlərində həmin verilişi böyük maraqla izləyirlər.
Macarıstanın “Duna” televiziya kanalı ilə faydalı əməkdaşlıq edilir. Proqram, konsert, sənədli film mübadilələri həyata keçirilir. Rusiya, Ukrayna, Belarus TV-ləri ilə münasibətlər qurulub. Avropa və Amerikanın nüfuzlu TV-ləri ilə əlaqələrin qurulması və inkişafı üçün müəyyən məsafə qət olunub. Hətta AzTV Cənubi Amerikanın, Asiyanın müxtəlif kanalları ilə də partnyorluq etmək üçün səylər göstərməkdədir. Dünyanın bir sıra TV kanalları ilə AzTV-nin imzaladığı əməkdaşlıq müqavilələri real nəticələrini verir və bundan sonra da verəcək. Hədəfimiz bəllidir: Qafqazın bir nömrəli televiziyası olmaq əsas məqsəddirsə, onun beynəlxalq əlaqələri də bu tələbə cavab verməlidir. Yəni daha çox faydalı əməkdaşlıq və Azərbaycanı daha çox tanıtmaq!
Bir məqamı da xüsusi ilə vurğulamaq istərdim. Vətən müharibəsinin getdiyi günlərdə bütün AzTV kollektivi, redaksiyalar müharibə şəraitinə uyğun gecə-günduz demədən çalışdı. Xarici partnyor televiziya kanalları, o cümlədən də nüfuzlu informasiya agentlikləri məhz AzTV vasitəsilə erməni vandalizmi haqqında xəbərləri, videogörüntüləri əldə etdilər, yayımladılar. Ən başlıcası, müzəffər Ali baş Komandanımız, Prezident İlham Əliyevin çıxışları həmin beynəlxalq informasiya agentlikləri vasitəsi ilə birbaşa yayımlanırdı. Bununla paralel olaraq AzTV rəhbərliyinin bilavasitə əsas tapşırığı Qarabağ barəsində tarixi həqiqətlərin ingilis dilinə çevrilərək partnyor əcnəbi TV kanallarına operativ şəkildə göndərilməsi idi. Bu iş də müvəffəqiyyətlə icra edilmişdir. O günlərdə bütün bunlar AzTV-nin xüsusi həssaslıq göstərdiyi istiqamətlər idi. Hər an yeni tapşırıqlar, göstərişlər, tövsiyələr analiz ediilb, xaricə partnyor TV-lərin həqiqətlərimiz barədə dolğun məlumatlandırılması üçün operativ qaydada göndərilirdi. Bu gün də bu proses davam etdirilir.
Bir məqamı da xüsusi qeyd edim ki, müharibədən sonra məhz bu faktlardan istifadə edilərək, hətta bəzi əcnəbi həmkarlarımız maraqlı kitablar da yazdılar.
Yəni əsas hədəfimiz dövlətimizə və millətimizə qüsursuz xidmət etməkdir”.
